眉筆大比拼～你用開邊隻都可以分享下！

好用？點好？真係要比較下先知。

今次比較既係4支唔同牌子既啡色眉筆，分別係 最淺色既K-Palette, 最平既LanaCane, 有形既EtudeHouse, 同好貴但易上色既M.A.C.

K-Palette Tattoo呢支係日本見到時買既，當時係想買支淺色既眉筆襯返髮色，就攞左支最淺色既，香港LOGON應該都有。易上度都OK， 尾部又有刷，自用好方便，唔想咁實同要淺色，用佢都幾好呀。我就通常用佢上眉前部份，夠自然，不過就短左啲，好快會刨晒。

呢支係咁多支入面最平，最長，最耐用，係Sasa買，深啡色，由學化妝到而家都用緊，因為真係好抵。自己畫眉都係用佢，尤其係眉尾，因為佢都深色。

呢隻來自M.A.C.既眉筆，真係好易上色，質地冇咁蠟質。試過出去同人化妝，遇到啲媽咪婆婆級，都好容易上到色，勁！而且佢係拎既，好方便，唔使刨。但價錢相對貴好多，而且唔耐用，好快用完，同埋個轉咀位好易壞。

之前去上韓妝時，老師俾我地用既其中一樣化妝品就係呢支眉筆，佢同M.A.C.一樣係拎出黎既，而且係三⻆形設計，而且有眉刷。
買佢既原因係覺得佢相對LanaCane易上色，價錢平，轉咀位又順滑啲，可以扭出扭入，可以試下搵佢取代M.A.C.

總結，如撇除價錢，當然M.A.C眉筆係首推，但價錢實在嚇人。第2位，我會揀EtudeHouse，佢夠方便，之前做JOB試上媽媽既眉都好易上色。第3位既當然係夠晒平既LanaCane啦，真係平得好緊要，我一次過買左幾支，因為之前去SASA成日搵唔到啡色，斷貨。不過佢成日畫到滑晒瓦，要係紙上畫幾下先再用得，不過佢一支好長，有排用。
最後就係K-Palette, 佢除左有出淺色系之外，都冇乜特別，而且佢相對地唔係好long lasting,   所以輸晒俾另外3支。